التخطي إلى المحتوى

أحمد فتحي مدرب طائرة سيدات الزمالك لـ«الأسبوع»: توفيق ربنا والروح القتالية وراء الفوز ببطولة أفريقيا

أحمد فتحي مدرب طائرة سيدات الزمالك لـ«الأسبوع»: توفيق ربنا والروح القتالية وراء الفوز ببطولة أفريقيا

كشف أحمد فتحي المدير الفني لفريق الزمالك للكرة الطائرة للسيدات كواليس تتويج القلعة البيضاء بلقب بطولة إفريقيا على حساب الغريم التقليدي الأهلي، وذلك في حوار خاص مع “بوابة الأسبوع”.

كما تحدث أحمد فتحي عن عودته للزمالك مرة أخرى، ونجاحه في إعادة الفريق للطريق الصحيح بعد فترة صعبة هذا الموسم، وجاء نص الحوار كالتالي:

في البداية مبروك الفوز ببطولة إفريقيا على حساب النادي الأهلي؟

الله يبارك فيك، الحمد الله رب العالمين بطولة غالية وتوفيق كبير من ربنا سبحانه وتعالى.

كيف تعاملت مع البنات نفسيا وفنيا بعد خسارة 3 بطولات محلية هذا الموسم قبل بطولة إفريقيا؟

الأمور كانت صعبة جدا جدا داخل الفريق سواء من الناحية الفنية أو النفسية أو حتى فى علاقة البنات ببعضها الفرقة فعلا كانت متفركشة، وبمجرد متعرض عليا الأمر من مجلس إدارة الزمالك وكمان من البنات وافقت على الفور وعملت للفريق معسكر مغلق لمدة 10 أيام وكنا تقريبا بنتمرن طول الـ24 ساعة صبح وظهر وليل.

والحمد الله ربنا كرم والفريق خرج من الحالة اللي كان فيها واحدة واحدة بعد خسارة بطولة السوبر المصري وبطولة الدوري والخروج من كأس مصر أمام نادي الشمس في الدور قبل النهائي، وتقريبا انا توليت القيادة الفنية للفريق قبل مباراة الشمس بـ48 ساعة فقط.

الزمالك رجع للمباراة وقدر يفوز بالبطولة على الرغم من تقدم الأهلي.. كيف نجحت في ذلك؟

توفيق ربنا سبحانه وتعالى بجانب الروح العالية والقتالية للبنات قدرنا نرجع للمباراة ونفوز بالبطولة.. أكيد الأهلى كانت دوافعه أكبر ونفسيا أفضل خاصة أنه فاز بجميع البطولات المحلية هذا الموسم بجانب أن البطولة على ملعبه وبين جماهيره فبكل تأكيد الحوافز عنده أعلى.

فى الشوط الأول من المباراة كنا فارقين بشكل كبير عن الأهلى ولكن بسبب بعض الأخطاء خسرنا الشوط ولكن رجعنا سريعا فى الشوط الثاني وكسبنا، وفي الشوط الثالث مكناش في حالتنا ووقعنا فى أخطاء كبيرة جدا أدت إلى أن الأهلى حسم الشوط بفارق كبير.

وفى هذا الشوط لما حسيت أن الفرق بدأ يزيد لصالح الاهلى بدأت أعمل تغيرات وخرجت مريم متولي ومايا ممدوح وميلكا وداليا المرشدى علشان اللاعيبة تفصل ذهنيا وتكون فايقة للشوط الرابع وكمان كان عندى هدف إني أنزل لاعيبة لعل وعسى تقدر تغير النتيجة ولكن ده محصلش.

وفي الشوط الرابع الأهلى كان وصل لنتيجة 14/19 وكان قرب جدا من الفوز بالشوط والبطولة ولكن عملت وقت مستقطع للاعيبتى بمجرد ما النتيجة زادت وقولت للبنات قبل التعليمات وأى حاجة بصوا على لاعيبة الأهلى الناحية التانية هتلاقيهم بيضحكوا وبيحتفلوا بالبطولة بدري 6 نقاط وده عيب جدا جدا عليكم.

وقتها البنات قالت هنموت فى أرض الملعب ومش هنخسر بإذن الله الشوط وهنعوض وفى نفس التوقيت جمهور الزمالك كان بيهتف ليهم وده فرق معاهم بشكل كبير وبالفعل الحمد الله كسبنا الشوط وفي الشوط الخامس كنا أفضل وكانت بنات الأهلى مش مصدقين أن البطولة خلاص بتروح منهم بعد مكانت فى أيدهم بالفعل اللى أقدر أقوله أحنا كسبنا بالبطولة بتوفيق كبير من ربنا سبحانه وتعالى مع روح البنات القتالية العالية.

ما رأيك في تعاقد الزمالك مع تقى مدحت لاعبة الشمس وتعاقد الأهلي مع حبيبة زعتر لاعبة الصيد؟

صفقات مهمة جدا جدا سواء للزمالك تقى أو للأهلى حبيبة مكسب كبير للفرقتين وإضافة كبيرة بالفعل.

هل في تدعيمات جديدة للزمالك بعد تقى مدحت؟

بإذن الله فى صفقتين جداد بيخلصوا خلال الساعات القليلة القادمة وبإذن الله هنجيب محترفة جديدة مع ميلكا اللى خلاص هتجدد عقدها مع نادى الزمالك.

ما هو سبب رحيل دانا شوقي عن الزمالك؟

دانا عقدها انتهى مع الزمالك والبنت جايلها عرض من اليونان وهي حابة تلعب الفترة القادمة في أوروبا سواء اليونان أو فرنسا ولو متوفقتش هترجع على نادى الزمالك بإذن الله واحنا أكيد بنتمنى كل التوفيق ليها لاعب مهمة جدا جدا سواء للزمالك او منتخب مصر.

هل لعب بعض اللاعبات فى الزمالك للأهلى بالماضي بيأثر على الفرقتين في الملعب؟

بكل تأكيد بيأثر في بعض الأوقات ومش هقول إنه مش بيكون فى تفكيرهم على الرغم أنهم كلهم صحاب جدا جدا خارج الملعب وفي المنتخبات، ولكن مثلا بعد انتقال مريم متولي ومريم مصطفى وفريدة العسقلانى ومايا ممدوح ودانا شوقى للزمالك كلهم بقى تفكيرهم إزاى نركز ونجيب بطولات ونحقق إنجازات لأن التفكير فى الماضى مش هيفيد بشيء.

أخيرا كابتن أحمد البعض كان بيقول إنك مرجعتش الزمالك إلا بعد حصولك على مستحقاتك القديمة؟

هذا الكلام غير صحيح.. أنا مع المجلس القديم كان ليا 8 شهور ومكافأة الفوز ببطولة كأس مصر وبطولة إفريقيا وللأسف ما حصلتش عليهم ومشيت لانى تقريبا اشتغلت موسم ببلاش وأكيد عندى التزامات وفعلا مكنتش عايز أمشى بس كان غصب عني وروحت سبورتنج وبمجرد متكلم معايا مجلس إدارة الزمالك الجديد برئاسة كابتن حسين لبيب وافقت على الفور.

وأول كلمة قولتها لازم البنات تتمرن النهاردة علشان ماتش الشمس لأنهم متمرنوش ولا أمبارح ولا أول.. وحصلت على 3 شهور من مستحقاتى القديمة يوم مباراة الزمالك أمام البنك الكينى في الدور قبل النهائى ببطولة إفريقيا.

أحمد فتحي مدرب طائرة سيدات الزمالك لـ«الأسبوع»: توفيق ربنا والروح القتالية وراء الفوز ببطولة أفريقيا

مصدر الخبر